Laka Ukulele

aloha :)
das isch jo mega toll, ihr heid sooo chalt bi euch und Schnee und i wird all wie bruener :)))

So isch wieder mol Ziit zum schriibae... isch e churzi Wuche gsi...

Das isch no s'Gruppefoeteli vo eusem Barbeque wo mer mit dr Schuel gha haend am Samschtig.

das isch no s'Foeteli vo eusem mega feine Schoggifondue, mit mega freine Fruecht :) und SCHWIZERSCHOGGI :o)

Am Mendig hani nach dr Schuel mit dr Kesang, em Jonathan und em Michi no Ukulele Unterricht gha, es isch eifach mega luschtig gsi und i wird negscht Wuche sicher mol Privatunterricht naeh... und wenns mi de immer no so ueberzuegt, de chaufi mer eini :))) es isch raecht witzig und vorallem e super Souvenier wo i au i dr Schwiiz cha bruuche :)

Am Zischtig simer Zobe wieder is Moose und do mer am Mittwuch kei Schuel gha haei si d'Lehrer au mitcho...(was no raecht luschtig isch, wenn me die mol vonere andere Site seht :o) Nur dr Josh isch nid cho, das isch euse Lehrer wo mer hei und de hett sone tolli Taetowierig ufem Buuch (die hett er eus am erschte Schueldaag scho zeigt...:))

Am Mittwuch, natuerli alli sehr mued, simer de is Reisebuero und hei euse Trip uf Big Island welle bueche, aaaaaaaaaber mir hei eus zu fescht as Laebe do gwoehnt und si halt zspot gange...(do machsch eifach alles wenn de grad mol Ziit hesch...) Mer hei ebe kei Flug meh becho... Sit dr Vulkan usbroche isch wei natuerli alli uf Big Island... Mer goei jetzt i 3 Wuche... immerhin...

nohaer simer an Army Beach und hei dr Freidaag gnosse... hei mol wieder dr Sunneuntergang agluegt und mol wieder paar Fotis gmacht :))

Gescht simer de is Duke's go aesse und i bi richtig froh gsi wo i min Taeller gseh ha und er isch nid sooo voll gsi :) Letschtmol hetts mer jo grad abgloescht...:)) Dos do i Hawaii so vill Asiate hett, Iwandere etc, isch a jedem Egge e Karaoke Bar... Und wie choennts au andersch si, euse Lehrer, dr Mike C. hett huett unbedingt welle go singe, statt unterrichte... Mir hei natuerli alli daenkt "am 10 morge go Singe, do muend mer no oepis ztrinke ha..." aber schlussaendlich hei alli automatisch mitgsunge...

Raege Raegetroepfli, es raegnet uf mis Choepfli...

hmmm... die Wuche isch irgendwie nid so schoen... Sit em Sunntig duets immer wieder bitz raegne... Es isch zwar e schoenere Raege als de i dr Schwiiz aber es isch glich unagnaehm, wenn me mit em Bikini am Strand sitzt und die chalte, nasse Tropfe gheie vom Himmel.

Umso mehr gniesse mer de dr Nomidaag wo mer an Strand choei - wos de ebe nid raegnet... :))

Am Mittwuch hei mer sit langem wiedermol dr Sunneuntergang gseh... es isch eifach so schoen... Freu mi scho, wenn i de au mol dr Sunneufgang seh...:))

Gescht Zobe simer no i "The Cheesecake Factory"go Znachtaesse. Nach ere Stund Warteziit hei mer de e grossi Charte becho mit diverse Hamburger, Pizzas, Spaghettis, Mexikanischem Zuegs und natuerli diverse Cheesecakes... :))

Zur Vorspies hei mer Fried Calamari gno, die si so haerzig chli gsi, aber natuerli hei mer die Portion zu 4 gaesse, will ein aellei haett das nid mol als Hauptgang moege...! Nohaer hani dr Classic Burger gha, saelbscht de isch zuuu gross gsi, i hanen de sogar mit Maesser und Gable gaesse will de nid is Muul passt hett... (E Hamburger mit Maesser und Gable aesse isch do ziemli verspoehnt...) aber jo... Hauptsach i ha suuberi Haend gha :))

ich mit em Hamburger

d'Michelle, d'Marina und d'Kesang

Nohaer simer de no witer is Duke's, das isch e sehr bekannti Bar, diraekt im Moana Surfrider Hotel. Isch wunderschoen gmacht, alles so Surferbilder etc... Vorallem diraekt am Strand :o)

Huett isch dr Karfrittig... und i bi i dr Schuel. Do wird d'Oschtere nid so gfiert... i ha aemel au noni wuerkli en Oschterhas gfunde aber i soett ein becho...:))) Huett zobe goei mer ane Barbeque und morn zum Zmittag grad nomol... mit dr Schuel am Beach :) Am Sunntig mache mer de i dr einte Residaenz es Schoggifondue :))) freu mi jetzt scho druf :))

moose, every tuesday 1 $ Night...

jede Zischtigobe isch im Moose 1 Dollar Night... und wie das halt so isch amne sone ort trifft me sich doert am obe... :)) gescht ischs irgendwie de doch no raecht luschtig gsi und mer so fascht zulang blibe... :(( aber nid alli getraenk si guet, also vo daem haer, nach eim hett me scho gnueg... :) eifach no zur info, min rot Chopf hani nid vom Alkohol sondern vo dr Sunne... Sunnebrand gits ebe au wenns duse bewoelkt isch :))) (Me lernt jede Daag neus) :))

ich und dr Jonathan, min Hostbrueder
es paar vo dr Schuel

d'Kesang, dr Jonathan, Ich und dr Michi

euse fein Drink, zwar no vonere andere Bar...

aaaaaaaaaaaaaaaaaaaah i ha mer de no e neus Natel kauft und ha jetzt e hawaiiischi Natelnummere. Si isch 001 808 349 53 38...

so... jetzt gangi a Strand... hoff s'Waetter isch besser als i de letschte 2 Daeg... es hett doch paarmol graegnet (also jo mol ab und zue es Troepfli) aber es isch glich nid so toll :( aber me cha jo au anderi Sache mache wenns mol nid so schoen isch... Honolulu bietet vill :)

second weekend

my second weekend here in Hawaii :))

mir hei es Auto gmietet, en Chevrolet, und si mit daem s'ganze Wucheaend umegfahre :) Am Samschtig simer an North Shore Beach (Surfer's Paradies), de an Turtle Bay, doert soettis eigentlich gaaaanz vill Schildchroet gaeh, aber wills keini gha hett simer de wieder zrugg gfahre und hei dr raescht vom Daag am Waimea Beach verbrocht, das isch eigentlich dr schoenschti bis jetzt :)

Zobe simer de no an Waikiki Beach go spaziere und irgendwenn de mol spot am morge simer zrugg gfahre :)

Am Samschtig hani no en neue Hostbrother becho... d'Schwiiz isch scho ziemlich chlii, will min "Brother" isch vo Therwil, glich alt wie ich und heisst Jonathan.

Kesang & Jonathansomewhere on the Highway

also somewhere on the Highway

Ich, Michelle & d'Marina

Gescht, am Sunntig, simer de mit am Auto an Kailua-Beach...das isch ahnschinend dr schoenscht Strand wo si do hei uf dr Insle Oahu, aber mir hett er nid soo guet gfalle... aber das cha au si wills so fescht gwindet hett und relativ chuehl gsi isch... :) nachdaem mer no paar troffe hei, simer de irgendwenn am 5i Zobe zrugg gfahre und i muess saege, i bi zum erschte mol MUED gsi...

I han mi Wecker huett am Morge zerscht gar nid ghoert und bi tooood mued ufgstande... bis jezt bini immer scho vorhaer wach gsi, will i dr Gueggel naebdra ghoert ha schreie, so ab de halb 5i morge, aber huett isch er glaub au ruhig gsi, oder i ha so schoen choenne schloefe wills so fescht graegnet het... hmmm...

Huet isch dr St. Patricks Day und das isch sone Fiertig vo de Irlaender...so wies usseht gits vo dene e paar do uf Hawaii will es laufe huett alli in Gruen ume (au ich :)) und es git no e grossi Parade in Honolulu... aber dos huet chalt isch bi eus... (MIR FRIERE!!!! zwar im shirt und de churze Hose, aber mir hei chalt!!!) hei mer beschlosse dass mer eifach bitz goei go umelaufe und nid a Strand goei... hihi...

Was i mol no woett erwaehne... I BI SCHO IM MEER GO SCHWIMME :o) UND I BI GLAUB SO WIT DASS I SOGAR UFES SURFBRAETT WUERD STOH :))) aber nur am Waikiki Beach, doert hetts naemli sooo vill Luett im Wasser dass bestimmt kei Haifisch chunnt :)) (Letschti soell jo grad ein ufgfraesse worde si, wo er hett welle go Haifischtauche im Chaefi, aber de Inteligaenzbolle isch ebe naebes Chaefi gumpt, statt ins... und si hei d'Haie scho aglockt mit em bluetige Fleisch!!!!!)

Mai Tai - Bar

Kesang & Ich

Roger & Chris

dr Michi und d'Kesang

d'Kesang isch vo Chur und i ha se jo scho einisch troffe i dr Schwiiz...mer si doch beidi froh dass mer scho oeper kennt hei... Do simer in dr Mai Tai Bar gsi (die Bescht uf Hawaii, ahnschinend) mit dr ganze Schuel... Leider si nur Schwizer mitcho...

so, jetzt schriib i doch mol oepis do ine... nid nur Foeteli :) mir gohts wunderbar do...i gniess es richtig, es isch schoen warm - nid zu heiss und alli luet si meeeeeega lieb :)) sogar dr buschauffeur redet mit eim und hilft eim wenn nid weisch wo usstige :))

mini gaschtfamilie isch au super... si sind mega haerzig, urspruenglich vo de Filipine, drum verstand i se nid immer so guet - und si mi :) aber so sind halt alli Familie do... Hawaii isch sehr Multikultruell.. Am Sunntig bini mit ihne scho ines Musical - si go Aladdin go luege :) (bi die einzig mit wiiser Huut gsi und "normale" Auge...).

d'Schuel isch au ganz ok, hett eifach raecht vill Schwizer do, bi scho grad bitz verschrocke...aber es isch au luschtig, dur das es de doch mol au no e paar vom Tessin und vo Lausanne/Gaenf si duend mer glich Aenglisch rede...

S'Familielaebe do isch au spannend. Also wenn me ines Huus inechunnt, muess me als erschte d'Schueh abzieh...niemerds lauft mit de Finke, Flip Flops oder Turnschueh dehaei ume... alli Barfuess... I finds super :)) De ischs au voellig normal, dass me mol en Gekko a dr Wand hett... will dr Gekko beduetet do uf Hawaii GLUECK und dass es suuber isch und keini Fliege, Schnogge etc. hett... I bi zwar scho raecht verstoche am ganze Koerper aber das isch vom Strand... (Isch halt wenn me immer doert liggt...:))

Es git ganz vill Straend do...alli eigentlich speziell und verschiide... aber jede isch super... de bim ALA MOANA (s'tuerschte Shoppingcenter vo Amerika- diraekt naeb minere Schuel :)) isch fuer die Iheimische...es hett nid vill Luet und wenn de ebe die Iheimische... dr Waikiki isch fantastisch...i lieb en... Doert si au d'Surfers und dr DUKE, dr Gott vom Surfe...

Diamond Head Crater - with Flip Flops :))

Sufers Paradies (North Shore Beach) and the Sunset...

Go to Hawaii, Hawaii... uuuuhhh, Honolulu, Waikiki :D Aloha

aloha :D

I send you a warm Aloha from a wonderful island :D

I has gschafft und bin acho :D dr Flug vo Los Angeles uf Honolulu isch 5 Stund gange und dank dr Angie hani e super Platz gha :D Ha d'Insle Big Island und Maui scho chönne aluege wo mer glandet si :D

d'Lourdes, d'Gaschtmum hett mi am Flughafe abgholt - ebe mit däm orange Schild :D und ere wunderschöne Bluemechätti... (e LEI :D)...

Nohär hani s'Huus chönne go aluege wo dr Familie Molina, seht ächt witzig us... wenn e Tür zuemachsch muesch ufpasse das nid alli Wänd usenand gheie :D und Huustier hei si jo zwar keini, aber a de Wänd findisch doch mol sone chline härzige Geko :D I find die Tierli mega härzig vo däm här stört mi das nid ;) Ha ebe de gescht welle fötele de isch er aber grad drvo... die hei mehr Angscht vor mir als i vor ihne :D

am Obe bini de scho an Beach, ha no dr Gabe troffe, en Texaner, wo do Feriä macht. Si de spontant go Znachtässä und im neue Ichaufszenter umegloffe (Louis Vuitton, Chanel, Abercrombie & Fitch, Burberry.... ha doch gwüsst das Hawaii düür isch :)))

Die Nacht hani no im Hotel gschloffe, will s'Zimmer i dr Family noni parat gsi isch... irgendwenn hütt zobe gangi de zrugg... aber am 15te chunnt e neue Schwizer ah, vo Züri und de blibt au für 3 Mönet do... mol luege...

So...d'Föteli folge no :D

Aloha and Mahalo :D

My first challenge - passed :D

Hello hello :D

I has ändlich gschafft und bin i Los Angeles acho... mer hei jetzt -9h Ziitverschiebig...die ganzi Stadt bäbt, goht go ässä und i sehn mi eifach nur no nach mim Bett (wo i fascht e Taburettli bruch zum ufechlättere!!)

Am Morge hani mi no vom Mami, em Papi und em Thomas verabschiedet und de bini au scho dur d'Sicherheitskontrolle...es isch alles ziemlich schnäll gange, ha de drfür öpä 2h chönne warte bis i ha chönne Boarde... Aber wie das so isch, d'Cabine Crew isch niene uffindbar gsi ;) Irgendwenn sind si de cho :D hihi...

Ha dänkt i due mi grad so irichte, dass i au schön cha schlofe, aber min Nochber, dr Sandy vo Minneapolis hett mi die ganze 9h unterhalte... (Hätt eigentlich grad wieder heichönne, ha so vill Änglisch glernt :o))

Nachdäm i de in Newark acho bi, hani ziemlich müesse pressiere... de am Zoll hett bitz dr Max gmacht, hett nid chönne verstoh wieso i zum Änglisch lernä uf Hawaii muess und was i dört will etc... nach däm sich alli hinter mir gnärvt hei hani de ändli witer chönne (bi de doch no 15 Min. dört gsi).

Mi Koffer isch cho, hanen wieder chönne abgäh - irgendwelchne Ghetto-Teenies wo e mega Buff gha händ... ha mer so mini Gedanke gmacht - und de bini mit em Zügli zum Gate C. Dört hani no zwöi Schwizer troffe, die wohne sit 48 Joor in Houston und die hei mer au grad ghulfe wäge dr Sicherheitskontrolle - i ha no 5 Min. gha und de hätt i bim Flugi sötte parat stoh! So nätt wie die alli sin, hei si mi dur d'Businessklass duregschleust und nach emnä Ändspurt hani grad chönne istige und abfliege... Dismol hani aber nid sone nätte Nochber gha...sone alte, grimmige Blödmann. De trinkt er no so vill dass er au schön Schnarchlet! :D

Dr Flug vo Newark uf Los Angeles isch traumhaft gsi - ämel am Afang... I ha die ganzi Landschaft chönne gniesse, s'hett au do gschneit! Wo mer de Richtig Rocky Mountains cho si ischs natürli für mi no spannender worde - i lieb d'Bärge! I glaub mer si sogar no dure Gran Canyon - hett ämel so roti Stei gha, aber de hetts zue do und s'Flugi hett alles i mim Mage duregschüttlet...und das bis mer glandet sin...

Und jo, jetzt lieg i do im Bett in Los Angeles (Fühl mi sehr wohl i dr Nöchi vom David Beckham ;)) iiirgendwo do wohnt er doch :o)) und ha Freud, dass i alli Köffere ha :))

Damit ihr au wüsset, was mi in Hawaii erwartet:

Friday Mar 7
Mostly Sunny
High: 82°F (27°C) Low: 70°F (21°C)

Saturday Mar 8
Sunny
High: 81°F (27°C) Low: 69°F (20°C)

Sunday Mar 9
Sunny
High: 82°F (27°C) Low: 70°F (21°C)

Monday Mar 10
Sunny
High: 82°F (27°C) Low: 70°F (21°C)

Aloha und Mahalo :D